නිබ්රූ සෙන්පතියතු වූ “සුවාර්‘ ගේ නායකත්වයෙන් පස් දෙනෙතුගෙන් සමන්විතව ඉරණවිලට ගොඩබෑ නිබෘෘ යානය ප්‍රමානයෙන් බස් රථයක් පමණ විය.මෙවැනිම තවත් නිබෘෘ යානා දෙකක් පෘථිවියේ තවත් ස්ථාන දෙකකට ගොඩ බාන ලද්දේ පෘථිවිය විනාශ කිරීමට නිබෘෘවරුන් සිදු කරන මෙහෙයුමේ නිරීක්ෂණ කටයුතු වෙනුවෙනි.
නිබෘෘ තාක්ෂණය යොදා තම යානාව අදෘෂ්‍යමාන තත්ත්වයට පත් කල සුවාර් තම අත රැදි උපකරණය දෙස මද වෙලාවක් බලා සිටියේය.එහි දර්ශන තිරයෙන් ග්‍රාහකය පෘථිවියේ ගැටීමේදී සිදුවන විනාශයේ පැතිරීම සුවාර්ට අවබෝධ විය.දිගු හුස්මක් හෙලමින් තමා අවට පරිසරය දෙස බැලූ සුවාර්ට පෘථිවියේ චමත්කාරය පිළිබඳ අමුතු ආකාරයේ ලෙන්ගතු බවක් දැනුනි.තමාගේ උරහිසේ දැවටුනු තුරුලතාවක් ඉතා ආදරයෙන් පිරිමැද එදෙස සානුකම්පිත බැල්මක් හෙලීය.
“අපට සමා වෙන්න, ඹබලාව විනාශ කිරීමට අපිත් අකමැතියි.නමුත් අපට මේ ලෝකය අවශ්‍ය වන්නේ අළුත් විදියකට එතකොට ඹයාලත් අළුත් වෙලා ඉදීවි.“ සුවාර් සෙමින් පැළෑටියට මිමුනුවේය.
එකෙනෙහිම යානාවෙන් බහින විට ඇතිවූ ආකාරයෙන්ම සුවාර්ගේ හිසට වේදනාවක් දෙමින් පෙර අවස්ථාවේ දර්ශනය වූ රජ වාසළ,රාජ මැති ඇමතිවරු පිරිවරා ගත් මහා රජෙක්,විශාල යුද්ධයක්,යුධ පිටියේදී හී සරයක් රජුගේ සිරුරට එල්ල වීමේ දර්ශන පෙළ නැවත පෙනෙන්නට විය.ඒ සමඟම තම සිරුර අප්‍රානික වන්නාක් මෙන් ඹහුට දැනුනි.
----------------------------------------------------------------------------------------------------------------------
මේ අතර ඇල්මියම් ග්‍රහලොව තුලද මහා යුද්ධයකි.ප්‍රමානයෙන් විශාල වීම,වායු ගෝලය යහපත් වීම භ්‍රමණ පරිභ්‍රමණ වේග අඩු වීම නිසා ජෛවී ක්‍රියාවලි මන්දනය වී ජීවීන්ට වැඩි ආයුෂ ප්‍රමාණයක් හිමි වීම මෙන්ම ඉතා ඉහළ ආයු කාලයක් ඇති සූර්යයන් දෙදෙනෙකුගේ ශක්තිය ලැබීම ආදී හේතූන් සැලකූ විට ඇල්මියම් ග්‍රහ ලොව නිබෘෘ ලොවට වඩා උසස් තත්ත්වයේ විය.මෙනිසා නිබ්රූවරු වසර දස දහස් ගනනක් පුරා ඇල්මියම් ග්‍රහ ලොව අල්ලා ගැනීමට උත්සාහ කරති.චන්ඩ ගති ඇති ආයුධ බලයෙන් සන්නද්ධ වූ නිබ්රූවරු එක් අවස්ථාවකදී ඇල්නියම් ග්‍රහ ලොව යටත් කර ගත්හ.නමුත් ඒ අවස්ථාවේදී විශ්ව ග්‍රහ ලෝක අතර මනා සහයෝගත්වයක් පවත්වමින් බල සම්පන්නව සිටි මහා රාවණා රජු මැදිහත්වී අභ්‍යවකාශ යානා මගින් ලගා විය නොහැකි ග්‍රහලෝක කිහිපයකට “තාරකා දොරටුව“ හරහා ඇල්මියම් වාසීන් රහසිගතව පිටත්කොට ඹවුන් යුධමය වශයෙන් බලවත් කොට නැවත තාරකා දොරටුව හරහාම ඇල්නියම් ග්‍රහ ලොවට යවා නිබ්රූ වරු පරදා තම ග්‍රහ ලොව නැවත දිනා ගැනීමට ඇල්මියම් වාසීන්ට උදවු කළේය.ග්‍රහලෝක හරහා තාරකා දොරටුවෙන් ගමන් කිරීමේ සංඛේත හදුනා ගැනීමේ විශේෂඥයකු වූ මහා රාවණා රජුගේ උදවු ලබාගෙන දෙවන වතාවටත් තම ග්‍රහ ලොව නිබ්රූවරුන්ගෙන් බේරා ගැනීමට තිබූ අවස්ථාව ඇල්මියම් වරුන්ට අහිමි වූයේ රාවණා රජුගේ සිරුර තැන්පත් සිසිර කාරක කුටිය නිබ්රූන් පැහැර ගැනීම නිසාය.
--------------------------------------------------------------------------------------------------------------------
සුවාර් නැවත සිහි ලබන විට සිටියේ තැනිතලා බිමකය.ඹහු සමඟ පැමිණි නිබෘෘන් පස් දෙනා තමා දෙස බලා සිටින අයුරු සුවාර් දුටුවේය.වේදනා දෙන හිස අල්ලා නැගී සිටි ඹහු පුදුමයට පත් වූයේ තම කණ්ඩායම් සඟයකු වූ රියොන් අත රැදි මාරක අවිය තමා දෙසට එල්ල වී ඇති ආකාරය දැකීමෙනි.
“ රියොන් මොකද මේ “ වික්ෂිප්තව සිටි සුවාර් රියොන් දෙස බලමින් ඇසුවේය.
කිසිවක් නොදෙඩූ රියොන් තම අත රැදි ආයුධය සෙමින් පහත් කර සුවාර්ට නැගී සිටීමට අත දිගු කලේය.
එකෙනෙහිම විදුලි සර ප්‍රහාර කිහිපයක් නිබෘෘ පිරිස වෙතට ඉහළ අහසේ සිට එල්ල විය.නීබෘෘ යානය ආ මඟ පිළිබඳ සැලකිල්ලෙන් පසුවූ ඇල්මියම් ප්‍රහාරක යානාවකින් එල්ල වූ එම හදිසි ප්‍රහාරයට මුහුණ දීමට නීබෘෘන් සය දෙනාට නොහැකි විය.ඹවුන්ගෙන් තිදෙනෙක්ම විදුලි සර ප්‍රහාරයෙන් මරුමුවට පත් විය.ඉතිරි වූ සුවාර් , රියොන් හා අනෙකා ඇල්මියම් සොල්දාදුවන්ගේ අත්අඩංගුවට පත් විය.
ජීව ග්‍රහයෙන් අල්ලා ගත් නිබෘෘන් තිදෙනාම ලෝහමය හිස් ආවරණ පැලැඳ සිටියහ.රියොන් හා අනෙකාගේ හිස් ආවරණ පහසුවෙන් ගැලවිය හැකි වුවත් සුවාර්ගේ ලෝහ හිස් ආවරණය ගැලවීම අසීරු විය.
“ මේකගේ ඹළුව සීල් කරලද?“ එක් ඇල්මියම් සෙබලෙක් ස්වාර්ගේ හිසට කේන්තියෙන් පහරක් දුන්නේය.
කෙසේ හෝ අවසානයේ මහත් වෙහෙසක් ගෙන සුවාර්ගේ ලෝහමය හිස් ආවරණය ගැලවීමට ඇල්මියම් සෙබළුන් සමත් විය.
අනිත් දෙදෙනාටම නීබෘෘ ග්‍රහ ලෝ වැසියන්ට ආවේනික වූ විරූපී බියකරු මුහුණු විය.නමුත් ලෝහමහ හිස් ආවරණයෙන් වැසී තිබූ සුවාර්ගේ මුහුණ දුටු විගසම ඇල්මියම් සෙබළ පිරිස මහත්වූ තැතිගැන්මකට ලක් විය.
------------------------------- මතු සම්බන්ධයි --------------------------------------------
1 comment:
මුල ඉඳලාම කියෙව්වා... ලස්සන කථාවක්. බොහොම අගෙයි.
Post a Comment